தமிழகத்தில் தென்மேற்கு வங்கக்கடல் மற்றும் தெற்கு கேரளத்தை ஒட்டிய பகுதிகளில் நிலவும் வளிமண்டல சுழற்சி காரணமாக, ஜூன் 1 முதல் 6 ஆம் தேதி வரை மாநிலத்தின் பல்வேறு பகுதிகளில் மழை தொடரும் என சென்னை வானிலை ஆய்வு மையம் தெரிவித்துள்ளது.

இதையடுத்து, ஜூன் 1 (திங்கள்கிழமை) தமிழகத்தின் 16 மாவட்டங்களுக்கு மஞ்சள் எச்சரிக்கை விடுக்கப்பட்டுள்ளது. இந்த மாவட்டங்களில் ஓரிரு இடங்களில் இடி, மின்னல் மற்றும் மணிக்கு 40 முதல் 50 கிலோமீட்டர் வேகத்தில் பலத்த காற்றுடன் கனமழை பெய்யக்கூடும் என எச்சரிக்கப்பட்டுள்ளது.

ஜூன் 1-ஆம் தேதி மஞ்சள் எச்சரிக்கை விடுக்கப்பட்ட மாவட்டங்கள்:

• நீலகிரி
• கோயம்புத்தூர்
• திருப்பூர்
• திண்டுக்கல்
• தேனி
• கரூர்
• நாமக்கல்
• ஈரோடு
• சேலம்
• திருச்சி
• தருமபுரி
• கிருஷ்ணகிரி
• திருப்பத்தூர்
• வேலூர்
• ராணிப்பேட்டை
• திருவண்ணாமலை

ஜூன் 2 மற்றும் 3-ஆம் தேதிகளிலும் கனமழை வாய்ப்பு

திருநெல்வேலி மலைப்பகுதிகள், கன்னியாகுமரி, தென்காசி, நீலகிரி, கோவை, திருப்பூர், திண்டுக்கல், தேனி, நாமக்கல், ஈரோடு, சேலம், தருமபுரி, கிருஷ்ணகிரி, திருப்பத்தூர், வேலூர், ராணிப்பேட்டை மற்றும் திருவண்ணாமலை மாவட்டங்களில் ஜூன் 2 மற்றும் 3 ஆகிய தேதிகளிலும் கனமழை பெய்யக்கூடும்.

மேலும், ஜூன் 4 அன்று திருநெல்வேலி மலைப்பகுதிகள், நீலகிரி, கோவை, திருப்பூர், ஈரோடு, சேலம், திண்டுக்கல், தேனி, விருதுநகர், தென்காசி மற்றும் கன்னியாகுமரி மாவட்டங்களுக்கும் கனமழை எச்சரிக்கை தொடர்கிறது.

சென்னை வானிலை

சென்னை மற்றும் புறநகர் பகுதிகளில் வானம் ஓரளவு மேகமூட்டத்துடன் காணப்படும். நகரின் சில பகுதிகளில் இடி, மின்னலுடன் கூடிய லேசான மழை பெய்ய வாய்ப்புள்ளது.

மீனவர்களுக்கு எச்சரிக்கை

ஜூன் 2 அன்று கேரள கடலோரப் பகுதிகள், லட்சத்தீவு மற்றும் அதனை ஒட்டிய மாலத்தீவு கடற்பகுதிகளில் மணிக்கு 55 கி.மீ வேகத்தில் சூறாவளிக் காற்று வீசக்கூடும் என்பதால் மீனவர்கள் எச்சரிக்கையுடன் இருக்குமாறு அறிவுறுத்தப்பட்டுள்ளது.

வெயில் தொடரும்

மழை வாய்ப்பு இருந்தாலும், தமிழகத்தின் சில பகுதிகளில் வெப்பநிலை தொடர்ந்து அதிகமாகவே பதிவாகி வருகிறது. அதிகபட்சமாக வேலூரில் 106.16 டிகிரி ஃபாரன்ஹீட் வெப்பநிலை பதிவாகியுள்ளது. திருச்சி, திருத்தணி, சென்னை, மதுரை, நாமக்கல் உள்ளிட்ட பகுதிகளிலும் 100 டிகிரி ஃபாரன்ஹீட்டை தாண்டிய வெப்பநிலை பதிவாகியுள்ளது.

அதிக மழை பதிவான பகுதிகள்

கடந்த 24 மணி நேரத்தில் அதிகபட்சமாக திருநெல்வேலி மாவட்டம் ஊத்து பகுதியில் 70 மி.மீ மழை பதிவாகியுள்ளது. நாலுமுக்கு (60 மி.மீ), காக்காச்சி (50 மி.மீ), தென்பரநாடு மற்றும் ஆத்தூர் (40 மி.மீ) பகுதிகளிலும் குறிப்பிடத்தக்க மழை பதிவாகியுள்ளது.

மழை மற்றும் பலத்த காற்று எச்சரிக்கை விடுக்கப்பட்டுள்ளதால், பொதுமக்கள் தேவையற்ற பயணங்களை தவிர்த்து பாதுகாப்பு முன்னெச்சரிக்கை நடவடிக்கைகளை மேற்கொள்ளுமாறு வானிலை ஆய்வு மையம் அறிவுறுத்தியுள்ளது.