ஷுப்மன் கில் சதம்.. ராஜஸ்தானை வீழ்த்தி IPL ஃபைனலுக்கு பறந்த குஜராத் டைட்டன்ஸ்!
IPL 2026 குவாலிஃபயர் 2 போட்டியில் ராஜஸ்தான் ராயல்ஸை 7 விக்கெட் வித்தியாசத்தில் வீழ்த்திய குஜராத் டைட்டன்ஸ் அணி இறுதிப்போட்டிக்கு முன்னேறியது. ஷுப்மன் கில் அதிரடி சதம் விளாசினார்.
Prasanth Subramani 
215 ரன்கள் என்ற கடின இலக்கை துரத்திய குஜராத் டைட்டன்ஸ் அணிக்கு கேப்டன் ஷுப்மன் கில் மற்றும் சாய் சுதர்சன் அபாரமான தொடக்கத்தை வழங்கினர்.
இருவரும் சேர்ந்து முதல் விக்கெட்டுக்கு 167 ரன்கள் குவித்து IPL பிளேஆஃப் வரலாற்றிலேயே அதிக ரன்கள் சேர்த்த தொடக்க ஜோடி என்ற சாதனையை படைத்தனர்.
சாய் சுதர்சன் 32 பந்துகளில் 58 ரன்கள் எடுத்து அணியின் வெற்றிக்கு வலுவான அடித்தளம் அமைத்தார்.
ஷுப்மன் கில்லின் வரலாற்று சதம்
கேப்டன் ஷுப்மன் கில் தனது வாழ்க்கையின் மிகச் சிறந்த IPL இன்னிங்ஸ்களில் ஒன்றை விளையாடினார்.
அவர் வெறும் 53 பந்துகளில் 104 ரன்கள் குவித்து சதம் விளாசினார். இதன் மூலம் IPL பிளேஆஃப் வரலாற்றில் அதிவேக சதம் அடித்த வீரர் என்ற புதிய சாதனையையும் படைத்தார்.
கில்லின் அதிரடி ஆட்டத்தால் குஜராத் டைட்டன்ஸ் அணி 18.4 ஓவர்களிலேயே இலக்கை எட்டியது. மேலும், இது குஜராத் அணியின் IPL வரலாற்றிலேயே மிகப்பெரிய வெற்றிகரமான ரன் சேஸாகவும் பதிவானது.
ஃபைனலில் RCB - GT மோதல்
இந்த வெற்றியின் மூலம் குஜராத் டைட்டன்ஸ் அணி இறுதிப்போட்டிக்கு தகுதி பெற்றுள்ளது.
அகமதாபாத்தில் நடைபெறவுள்ள IPL 2026 இறுதிப்போட்டியில் நடப்பு சாம்பியனான ராயல் சேலஞ்சர்ஸ் பெங்களூரு அணியை குஜராத் டைட்டன்ஸ் எதிர்கொள்ள உள்ளது.
இரு பலம் வாய்ந்த அணிகள் மோதவுள்ள இந்த ஃபைனல் போட்டி ரசிகர்களிடையே மிகப்பெரிய எதிர்பார்ப்பை ஏற்படுத்தியுள்ளது.
