மும்பையை மிரட்டிய ராஜஸ்தான் ராயல்ஸ்.. 30 ரன்கள் வெற்றி பெற்று IPL பிளேஆஃப்ஸுக்கு தகுதி!
IPL 2026 தொடரில் மும்பை இந்தியன்ஸை 30 ரன்கள் வித்தியாசத்தில் வீழ்த்திய ராஜஸ்தான் ராயல்ஸ் அணி பிளேஆஃப்ஸ் சுற்றுக்கு அதிகாரப்பூர்வமாக தகுதி பெற்றது.
Prasanth Subramani 
IPL 2026 தொடரின் முக்கியமான லீக் போட்டியில் ராஜஸ்தான் ராயல்ஸ் அணி, மும்பை இந்தியன்ஸை 30 ரன்கள் வித்தியாசத்தில் வீழ்த்தி பிளேஆஃப்ஸ் சுற்றுக்கு அதிகாரப்பூர்வமாக தகுதி பெற்றுள்ளது.
முதலில் பேட்டிங் செய்த ராஜஸ்தான் ராயல்ஸ் அணி 20 ஓவர்கள் முடிவில் 205/8 என்ற பெரிய இலக்கை பதிவு செய்தது. அணியின் தொடக்க மற்றும் நடுப்பகுதி வீரர்கள் அதிரடியான ஆட்டத்தின் மூலம் வலுவான அடித்தளத்தை அமைத்தனர்.
பின்னர் இறுதி ஓவர்களில் ஜோஃப்ரா ஆர்ச்சர் வெடித்துச் சிதறிய பேட்டிங்கால் ரசிகர்களை உற்சாகப்படுத்தினார். வெறும் 15 பந்துகளில் 32 ரன்கள் குவித்த அவர், ராஜஸ்தான் அணியின் ஸ்கோரை 200 ரன்களுக்கு மேல் உயர்த்த முக்கிய பங்காற்றினார்.
206 ரன்கள் என்ற கடின இலக்கை துரத்திய மும்பை இந்தியன்ஸ் அணி ஆரம்பத்தில் அதிரடியாக விளையாட முயன்றாலும், சீரான இடைவெளிகளில் விக்கெட்டுகளை இழந்தது. ஒருபுறம் சூர்யகுமார் யாதவ் சிறப்பாக போராடி 60 ரன்கள் எடுத்தாலும், மற்ற வீரர்களிடம் இருந்து போதிய ஆதரவு கிடைக்கவில்லை.
ராஜஸ்தான் அணியின் பந்துவீச்சாளர்கள் நடுப்பகுதி ஓவர்களில் கடுமையான அழுத்தத்தை ஏற்படுத்தி, மும்பை அணிக்கு கூட்டணிகளை அமைக்கவே வாய்ப்பு அளிக்கவில்லை.
இந்த போட்டியின் மிகப்பெரிய நாயகனாக ஜோஃப்ரா ஆர்ச்சர் திகழ்ந்தார். பேட்டிங்கில் அதிரடி காட்டியதோடு, பந்துவீச்சிலும் 17 ரன்கள் மட்டுமே விட்டுக்கொடுத்து 3 விக்கெட்டுகளை கைப்பற்றி அசத்தினார். அவரது வேகம் மற்றும் துல்லியமான பந்துவீச்சு போட்டியின் திருப்புமுனையாக அமைந்தது.
இந்த வெற்றியின் மூலம் ராஜஸ்தான் ராயல்ஸ் அணி IPL 2026 பிளேஆஃப்ஸ் சுற்றில் தனது இடத்தை உறுதி செய்துள்ளது. அதேசமயம், மும்பை இந்தியன்ஸ் அணியின் அடுத்த கட்ட வாய்ப்பு தற்போது சிக்கலான நிலைக்கு தள்ளப்பட்டுள்ளது.
