கோவையின் VOC பூங்கா புதிய விளையாட்டு மையமாக மாறுகிறது.. ₹8 கோடி திட்டம் தீவிரம்!
கோவையில் மூடப்பட்டுள்ள VOC பூங்கா உயிரியல் பூங்கா, நவீன விளையாட்டு மையமாக மாற்றப்படுகிறது. ரூ.8 கோடி மதிப்பிலான இந்த திட்டம் அடுத்த 2 முதல் 3 மாதங்களில் திறக்கப்பட உள்ளது.
Prasanth Subramani 
கோவையில் பல ஆண்டுகளாக மூடப்பட்டிருந்த VOC பூங்கா மற்றும் உயிரியல் பூங்கா பகுதி, விரைவில் நவீன விளையாட்டு மையமாக மாற்றப்பட உள்ளது.
கோவை மாநகர மக்களுக்கு மேம்பட்ட விளையாட்டு வசதிகளை வழங்கும் நோக்கில் மேற்கொள்ளப்பட்டுள்ள இந்த திட்டம் தற்போது வேகமாக முன்னேறி வருகிறது.
ரூ.8 கோடி மதிப்பிலான இந்த திட்டத்தின் கீழ், சர்வதேச தரத்தில் இரண்டு நவீன நீச்சல் குளங்கள் அமைக்கப்படுகின்றன. மேலும், விளையாட்டு வீரர்கள் மற்றும் பொதுமக்கள் பயன்பெறும் வகையில் பல்வேறு வசதிகளும் உருவாக்கப்பட்டு வருகின்றன.
கட்டுமானப் பணிகள் இறுதிக்கட்டத்தை நோக்கி நகர்ந்து வருவதாகவும், அடுத்த 2 முதல் 3 மாதங்களுக்குள் இந்த புதிய விளையாட்டு மையம் பொதுமக்கள் பயன்பாட்டிற்கு திறக்கப்படும் என எதிர்பார்க்கப்படுவதாகவும் தகவல்கள் தெரிவிக்கின்றன.
ஒருகாலத்தில் கோவை மக்களின் முக்கிய பொழுதுபோக்கு இடமாக விளங்கிய VOC பூங்கா, தற்போது புதிய வடிவில் விளையாட்டு மற்றும் உடற்தகுதி மையமாக உருவெடுப்பது நகர வளர்ச்சியின் முக்கிய முன்னேற்றமாக பார்க்கப்படுகிறது.
இந்த திட்டம் நிறைவேறிய பிறகு, கோவையில் நீச்சல் மற்றும் பிற விளையாட்டு பயிற்சிகளுக்கான முக்கிய மையங்களில் ஒன்றாக VOC விளையாட்டு வளாகம் உருவாகும் என எதிர்பார்க்கப்படுகிறது.
