ஆஸ்திரேலியா அபார வெற்றி.. பாகிஸ்தானை 113 ரன்கள் வித்தியாசத்தில் வீழ்த்தி அரையிறுதி வாய்ப்பை உறுதிப்படுத்தியது!
மகளிர் டி20 உலகக்கோப்பை 2026-ன் 21வது லீக் போட்டியில் ஆஸ்திரேலியா 113 ரன்கள் வித்தியாசத்தில் பாகிஸ்தானை வீழ்த்தியது. எலிஸ் பெர்ரி 71 ரன்கள் மற்றும் 2 விக்கெட்டுகள் எடுத்து ஆட்டநாயகி விருதை வென்றார்.
Prasanth Subramani 
ICC 10வது மகளிர் டி20 உலகக்கோப்பையின் 21வது லீக் போட்டியில் ஆஸ்திரேலியா அணி 113 ரன்கள் வித்தியாசத்தில் பாகிஸ்தானை அபாரமாக வீழ்த்தி தொடரில் தனது ஆதிக்கத்தை தொடர்ந்தது. லீட்ஸில் நடைபெற்ற இந்த போட்டியில் ஆஸ்திரேலியாவின் அனுபவமும், பந்துவீச்சின் துல்லியமும் பாகிஸ்தானுக்கு எந்த வாய்ப்பையும் வழங்கவில்லை.
டாஸ் வென்ற ஆஸ்திரேலியா முதலில் பேட்டிங் செய்யத் தீர்மானித்தது. முதல் பந்திலேயே பெத் மூனியின் விக்கெட்டை இழந்தாலும், எலிஸ் பெர்ரி மற்றும் ஜார்ஜியா வோல் இணைந்து அதிரடியான கூட்டணியை அமைத்து அணியை மீட்டனர். பவர்பிளே முடிவில் ஆஸ்திரேலியா 64/1 என்ற வலுவான நிலையில் இருந்தது.
எலிஸ் பெர்ரி தனது அனுபவத்தை முழுமையாக வெளிப்படுத்தி 30 பந்துகளில் அரைசதம் அடித்தார். மறுமுனையில் ஜார்ஜியா வோல் சிறப்பாக விளையாடி அணியின் ரன் வேகத்தை உயர்த்தினார். பின்னர் அன்னபெல் சதர்லண்ட், நிக்கோலா கேரி ஆகியோரும் இறுதிக்கட்டத்தில் வேகமாக ரன்கள் சேர்த்தனர்.
பாகிஸ்தான் சுழற்பந்து வீச்சாளர்கள் சில கட்டங்களில் ஆஸ்திரேலியாவை கட்டுப்படுத்தினாலும், பெர்ரியின் 71 ரன்கள் மற்றும் நடுப்பகுதியில் கிடைத்த அதிரடி ஆட்டம் காரணமாக ஆஸ்திரேலியா 20 ஓவர்கள் முடிவில் 199/7 என்ற வலுவான இலக்கை நிர்ணயித்தது.
200 ரன்கள் இலக்கை துரத்திய பாகிஸ்தான் அணிக்கு ஆரம்பத்திலேயே அதிர்ச்சி காத்திருந்தது. ரன் அவுட்கள் மற்றும் தொடர்ச்சியான விக்கெட் இழப்புகள் அந்த அணியின் முன்னேற்றத்தை பாதித்தன. முனீபா அலி மற்றும் இராம் ஜாவேத் மட்டும் ஓரளவு எதிர்த்து விளையாடினாலும், மற்ற பேட்ஸ்மேன்கள் நிலைத்து நிற்க முடியவில்லை.
ஆஸ்திரேலிய பந்துவீச்சில் ஜார்ஜியா வேர்ஹாம், எலிஸ் பெர்ரி, சோபி மொலினியூ, அன்னபெல் சதர்லண்ட் ஆகியோர் துல்லியமாக பந்துவீசி பாகிஸ்தான் பேட்டிங் வரிசையை சிதறடித்தனர். 50/3 என்ற நிலையில் இருந்த பாகிஸ்தான் அணி அடுத்த 36 ரன்களுக்குள் மீதமுள்ள 7 விக்கெட்டுகளையும் இழந்து 86 ரன்களுக்கு ஆல் அவுட்டானது.
இதன் மூலம் ஆஸ்திரேலியா 113 ரன்கள் வித்தியாசத்தில் அபார வெற்றி பெற்று 8 புள்ளிகளுடன் அரையிறுதி வாய்ப்பை மேலும் உறுதிப்படுத்தியது. மறுபுறம், தொடரில் இன்னும் வெற்றியைப் பதிவு செய்யாத பாகிஸ்தான் அணி புள்ளிப்பட்டியலில் கடைசி இடத்தை நோக்கி நகர்ந்துள்ளது.
பேட்டிங்கில் 71 ரன்களும், பந்துவீச்சில் 2 முக்கிய விக்கெட்டுகளும் கைப்பற்றி ஆஸ்திரேலியாவின் வெற்றியில் முக்கிய பங்காற்றிய எலிஸ் பெர்ரி ஆட்டநாயகி விருதை வென்றார்.
