கோவையில் செயல்படத் தொடங்கிய சிங்கப்பெண் அதிரடிப்படை: பெண்கள் பாதுகாப்புக்கு புதிய பலம்
பெண்களின் பாதுகாப்பை வலுப்படுத்தும் நோக்கில் உருவாக்கப்பட்ட சிங்கப்பெண் அதிரடிப்படை கோவை மாவட்டத்தில் அதிகாரப்பூர்வமாக செயல்படத் தொடங்கியுள்ளது. பெண்களுக்கு எதிரான குற்றங்களை தடுப்பதில் இந்த படை முக்கிய பங்கு வகிக்க உள்ளது.
Prasanth Subramani 
பெண்களின் பாதுகாப்பை மேலும் வலுப்படுத்தும் நோக்கில் தமிழ்நாடு அரசால் உருவாக்கப்பட்ட சிங்கப்பெண் அதிரடிப்படை, கோவை மாவட்டத்தில் அதிகாரப்பூர்வமாக செயல்படத் தொடங்கியுள்ளது. இந்த சிறப்பு காவல் பிரிவு பெண்களுக்கு எதிரான குற்றங்களைத் தடுக்கவும், பாதுகாப்பான சமூக சூழலை உருவாக்கவும் முக்கிய பங்கு வகிக்க உள்ளது.
கோவை மாவட்டத்தின் முக்கிய பகுதிகளில் சிங்கப்பெண் அதிரடிப்படை வீராங்கனைகள் ரோந்து பணியில் ஈடுபடுத்தப்பட்டுள்ளனர். பள்ளிகள், கல்லூரிகள், பேருந்து நிலையங்கள், ரயில் நிலையங்கள், வணிக வளாகங்கள் மற்றும் மக்கள் அதிகம் கூடும் இடங்களில் கண்காணிப்பு மேற்கொள்ளப்பட உள்ளது.
பெண்களை பின்தொடர்தல், பாலியல் தொல்லை, துன்புறுத்தல், பொதுஇடங்களில் அத்துமீறல், பேருந்துகள் மற்றும் கூட்டமான இடங்களில் பெண்களுக்கு எதிரான குற்றச்செயல்கள் போன்றவற்றை தடுப்பதே இந்த படையின் முக்கிய நோக்கமாகும்.
நவீன தொழில்நுட்ப வசதிகளுடன் செயல்படும் இந்த அதிரடிப்படை, அவசர அழைப்புகளுக்கு உடனடி பதிலளிப்பதுடன், பெண்கள் பாதுகாப்பு தொடர்பான புகார்களுக்கும் விரைவான நடவடிக்கை எடுக்கவுள்ளது.
தமிழ்நாடு முழுவதும் பெண்கள் பாதுகாப்பை உறுதி செய்யும் அரசின் முக்கிய முயற்சிகளில் ஒன்றாக சிங்கப்பெண் அதிரடிப்படை கருதப்படுகிறது. கோவையில் இந்த படை செயல்படத் தொடங்கியிருப்பது, பெண்கள் மற்றும் மாணவிகளுக்கு கூடுதல் நம்பிக்கையையும் பாதுகாப்பு உணர்வையும் ஏற்படுத்தும் என அதிகாரிகள் தெரிவித்துள்ளனர்.
பெண்கள் அச்சமின்றி கல்வி, வேலை மற்றும் அன்றாட செயல்பாடுகளில் ஈடுபடுவதற்கான பாதுகாப்பான சூழலை உருவாக்கும் நோக்கில் சிங்கப்பெண் அதிரடிப்படை தொடர்ந்து கண்காணிப்பு மற்றும் தடுப்பு நடவடிக்கைகளை மேற்கொள்ளும் என காவல்துறை தெரிவித்துள்ளது.
