தமிழ்த் திரையுலகின் புகழ்பெற்ற இயக்குநரும், "இயக்குநர் இமயம்" எனப் போற்றப்பட்டவருமான பாரதிராஜாவின் மறைவுக்கு தமிழகம் முழுவதும் இரங்கல் அலை எழுந்துள்ளது. இந்நிலையில், அவரது இறுதிப் பயணத்திற்கு அரசு மரியாதை வழங்கப்படும் என தமிழக முதல்வர் விஜய் அறிவித்துள்ளார்.

சமீபகாலமாக உடல்நலக் குறைவால் பாதிக்கப்பட்டிருந்த பாரதிராஜா, சென்னை நீலாங்கரையில் உள்ள தனது இல்லத்தில் சிகிச்சை பெற்று வந்தார். இந்நிலையில், சிகிச்சைப் பலனின்றி இன்று (ஜூன் 10) அதிகாலை காலமானார். அவரது மறைவு தமிழ் திரைப்பட உலகிற்கு பெரும் இழப்பாகக் கருதப்படுகிறது.

பாரதிராஜாவின் மறைவு செய்தி பரவியதைத் தொடர்ந்து, திரையுலகப் பிரபலங்கள், அரசியல் தலைவர்கள் மற்றும் ரசிகர்கள் அவரது இல்லத்திற்கு நேரில் சென்று அஞ்சலி செலுத்தி வருகின்றனர். இன்று காலை முதல்வர் விஜய், பாரதிராஜாவின் இல்லத்துக்கு சென்று மலர்வளையம் வைத்து இறுதி அஞ்சலி செலுத்தினார்.

மேலும், நாம் தமிழர் கட்சி ஒருங்கிணைப்பாளர் சீமான், கவிஞர் வைரமுத்து, இசையமைப்பாளர் கங்கை அமரன், நடிகை சுஹாசினி, நடிகர் சூர்யா உள்ளிட்ட பல்வேறு முக்கிய பிரபலங்களும் நேரில் அஞ்சலி செலுத்தினர். தொடர்ந்து திரையுலக மற்றும் அரசியல் துறையைச் சேர்ந்த பலரும் அஞ்சலி செலுத்தி வருகின்றனர்.

இதுகுறித்து தனது சமூக வலைதளப் பதிவில் முதல்வர் விஜய், "தமிழ்த் திரையுலகின் இயக்குநர் இமயம் பாரதிராஜா காலமானார் என்ற செய்தி மிகுந்த துயரத்தை அளிக்கிறது. கிராமிய வாழ்க்கையின் உண்மை முகத்தை திரையில் உயிரோட்டத்துடன் பதிவு செய்து, தமிழ் சினிமாவில் தனித்துவமான முத்திரையைப் பதித்தவர் பாரதிராஜா" என்று குறிப்பிட்டுள்ளார்.

மேலும், பத்மஸ்ரீ உள்ளிட்ட பல தேசிய மற்றும் மாநில விருதுகளை பெற்ற பாரதிராஜா, பல தலைமுறைக் கலைஞர்களை உருவாக்கியவர் என்றும், அவரது பங்களிப்பு தமிழ் திரைப்பட வரலாற்றில் என்றும் நிலைத்திருக்கும் என்றும் முதல்வர் புகழாரம் சூட்டியுள்ளார்.

அவரது குடும்பத்தினருக்கும், நண்பர்களுக்கும், திரையுலகினருக்கும் மற்றும் ரசிகர்களுக்கும் ஆழ்ந்த இரங்கலைத் தெரிவித்த முதல்வர் விஜய், பாரதிராஜாவின் ஆன்மா சாந்தியடைய பிரார்த்திப்பதாகவும் கூறியுள்ளார்.

திரைத்துறையில் அவர் ஆற்றிய மகத்தான பங்களிப்பை போற்றும் வகையில், அவரது இறுதிச் சடங்குகள் அரசு மரியாதையுடன் நடைபெறும் என முதல்வர் அறிவித்துள்ளார். இது பாரதிராஜாவுக்கு தமிழக அரசு செலுத்தும் உயரிய அஞ்சலியாக பார்க்கப்படுகிறது.