ஆர்பிஐ கொள்கை அறிவிப்புக்கு முன் பங்குச்சந்தை அமைதி: சென்செக்ஸ், நிஃப்டி சிறிய உயர்வுடன் நிறைவு
ஆர்பிஐ கொள்கை அறிவிப்புக்கு முன் முதலீட்டாளர்கள் எச்சரிக்கையுடன் செயல்பட்டதால் இந்திய பங்குச்சந்தைகள் ஏற்ற இறக்கமின்றி நிறைவடைந்தன. சென்செக்ஸ் 14 புள்ளிகளும், நிஃப்டி 11 புள்ளிகளும் உயர்ந்தன.
Prasanth Subramani 
ஆர்பிஐயின் முக்கிய பணவியல் கொள்கை அறிவிப்பை முன்னிட்டு முதலீட்டாளர்கள் எச்சரிக்கையுடன் செயல்பட்டதால், இந்திய பங்குச்சந்தைகள் இன்று பெரும்பாலும் மாற்றமின்றி நிறைவடைந்தன. மும்பை பங்குச்சந்தை குறியீட்டெண் சென்செக்ஸ் 14 புள்ளிகள் உயர்ந்து 74,360 புள்ளிகளில் முடிவடைந்தது. அதேபோல், தேசிய பங்குச்சந்தை குறியீட்டெண் நிஃப்டி 50, 11 புள்ளிகள் உயர்ந்து 23,416 புள்ளிகளில் நிலைபெற்றது.
நிதித்துறை, மிட்கேப் மற்றும் ஸ்மால்கேப் பங்குகள் சந்தைக்கு ஆதரவாக செயல்பட்ட நிலையில், தகவல் தொழில்நுட்ப (IT) துறையில் விற்பனை அழுத்தம் காணப்பட்டது. டைட்டன் மற்றும் ஐடிசி பங்குகள் குறிப்பிடத்தக்க உயர்வைப் பதிவு செய்தன. மறுபுறம், இன்போசிஸ் மற்றும் பஜாஜ் ஃபின்சர்வ் பங்குகள் சரிவுடன் முடிவடைந்தன.
ஆர்பிஐயின் கொள்கை முடிவு சந்தையின் அடுத்தகட்ட திசையை நிர்ணயிக்கும் என்பதால், முதலீட்டாளர்கள் மற்றும் வர்த்தகர்கள் அதன் அறிவிப்பை உன்னிப்பாக கவனித்து வருகின்றனர். வட்டி விகிதங்கள் மற்றும் பொருளாதார வளர்ச்சி தொடர்பான அறிவிப்புகள் சந்தையில் குறிப்பிடத்தக்க தாக்கத்தை ஏற்படுத்தும் என எதிர்பார்க்கப்படுகிறது.
