கேத்ரின், கேத்ரின் ஃப்ரேசர், கிற்ஸ்டி கார்டன் அசத்தல்; உலகக் கோப்பையில் முதல் வெற்றியைப் பதிவு செய்த ஸ்காட்லாந்து

2026 ஐசிசி மகளிர் டி20 உலகக் கோப்பை தொடரின் 2வது போட்டியில் ஸ்காட்லாந்து அணி, அயர்லாந்தை 40 ரன்கள் வித்தியாசத்தில் வீழ்த்தி உலகக் கோப்பை வரலாற்றில் முக்கியமான வெற்றியைப் பதிவு செய்தது. மான்செஸ்டரில் உள்ள ஓல்ட் டிராஃபோர்டில் நடைபெற்ற இந்தப் போட்டியில் கேத்ரின் பிரைஸ் ஆல்-ரவுண்ட் திறமையை வெளிப்படுத்தி ஆட்ட நாயகி விருதை வென்றார்.

டாஸ் வென்ற அயர்லாந்து அணி முதலில் பந்துவீச்சைத் தேர்வு செய்தது. பலத்த காற்று வீசிய சூழலில் தொடக்க வீராங்கனைகளான டார்சி கார்டர் மற்றும் கேத்ரின் ஃப்ரேசர் எச்சரிக்கையுடன் ஆட்டத்தை தொடங்கினர். ஆனால் பவர் பிளே முடிவில் இரண்டு விக்கெட்டுகளை இழந்ததால் ஸ்காட்லாந்து 37/2 என்ற நிலையில் இருந்தது.

அதன்பின் களமிறங்கிய பிரைஸ் சகோதரிகள் கேத்ரின் பிரைஸ் மற்றும் சாரா பிரைஸ் அணியை மீட்டெடுத்தனர். இருவரும் இணைந்து மூன்றாவது விக்கெட்டுக்கு 106 ரன்கள் சேர்த்து அயர்லாந்து பந்துவீச்சை சிதறடித்தனர். 11வது மற்றும் 12வது ஓவர்களில் அதிரடியாக ரன்கள் குவித்த இந்த ஜோடி, போட்டியின் போக்கையே மாற்றியது.

சாரா பிரைஸ் அரைசதத்தை நெருங்கிய நிலையில் 49 ரன்களில் ஆட்டமிழந்தார். மறுமுனையில் தொடர்ந்து தாக்குதல் ஆட்டம் ஆடிய கேத்ரின் பிரைஸ் 60 ரன்கள் குவித்தார். இறுதி ஓவர்களில் அயர்லாந்து பந்துவீச்சாளர்கள் சிறப்பாக செயல்பட்டதால் ஸ்காட்லாந்து 20 ஓவர்களில் 161/5 ரன்கள் எடுத்தது.

162 ரன்கள் என்ற இலக்கை துரத்திய அயர்லாந்து அணிக்கு தொடக்கத்தில் பெரிய பின்னடைவு ஏற்பட்டது. கேபி லூயிஸ் உள்ளிட்ட முக்கிய வீராங்கனைகள் விரைவில் ஆட்டமிழந்ததால் அந்த அணி அழுத்தத்தில் சிக்கியது.

ஸ்காட்லாந்தின் சுழற்பந்துவீச்சாளர்கள் கேத்ரின் ஃப்ரேசர் மற்றும் கிற்ஸ்டி கார்டன் அபாரமாக பந்துவீசி அயர்லாந்தின் நடுப்பகுதி வரிசையை சிதறடித்தனர். குறிப்பாக 13வது ஓவரில் கிற்ஸ்டி கார்டன் மூன்று முக்கிய விக்கெட்டுகளை வீழ்த்தி போட்டியை முழுமையாக ஸ்காட்லாந்தின் பக்கம் திருப்பினார்.

70/6 என்ற மோசமான நிலையில் இருந்த அயர்லாந்துக்கு ஆர்லா பிரெண்டர்காஸ்ட் மற்றும் ஆர்லீன் கெல்லி நம்பிக்கை அளித்தனர். இருவரும் சில சிறப்பான பவுண்டரிகளை அடித்து போராடினாலும், முக்கிய தருணங்களில் ஏற்பட்ட ரன் அவுட்கள் அணியின் வாய்ப்பை முடிவுக்கு கொண்டு வந்தன.

ஆர்லா பிரெண்டர்காஸ்ட் மற்றும் ஆர்லீன் கெல்லி இருவரும் ரன் அவுட் ஆனதுடன், அயர்லாந்தின் கடைசி நம்பிக்கையும் சிதைந்தது. இறுதியில் அயர்லாந்து அணி 19.1 ஓவர்களில் 121 ரன்களுக்கு அனைத்து விக்கெட்டுகளையும் இழந்தது.

இதன் மூலம் ஸ்காட்லாந்து அணி 40 ரன்கள் வித்தியாசத்தில் அபார வெற்றி பெற்று 2 புள்ளிகளைப் பெற்றது. பேட்டிங்கில் கேத்ரின் பிரைஸ், சாரா பிரைஸ் மற்றும் பந்துவீச்சில் கேத்ரின் ஃப்ரேசர், கிற்ஸ்டி கார்டன் ஆகியோர் வெற்றியின் முக்கிய நாயகிகளாக திகழ்ந்தனர்.

உலகக் கோப்பை வரலாற்றில் முக்கியமான வெற்றியை பதிவு செய்துள்ள ஸ்காட்லாந்து அணி, இந்த வெற்றியின் மூலம் அடுத்த சுற்றுக்கான நம்பிக்கையை வலுப்படுத்தியுள்ளது. மறுபுறம் அயர்லாந்து அணி தனது முதல் போட்டியிலேயே தோல்வியை சந்தித்து புள்ளிகள் இன்றி தொடரை தொடங்கியுள்ளது.