ஐசிசி மகளிர் டி20 உலகக் கோப்பை 2026 இன்று தொடக்கம்: சாம்பியன் பட்டத்தை நோக்கி இந்தியா

ஐசிசி மகளிர் டி20 உலகக் கோப்பை கிரிக்கெட் தொடரின் 10வது பதிப்பு இன்று (ஜூன் 12, 2026) இங்கிலாந்தில் கோலாகலமாக தொடங்குகிறது. ஜூலை 5ஆம் தேதி வரை நடைபெறும் இந்த பிரம்மாண்ட தொடரை இங்கிலாந்து மற்றும் வேல்ஸ் கிரிக்கெட் வாரியம் இணைந்து நடத்துகிறது.

இந்த முறை உலகக் கோப்பையில் அதிகபட்சமாக 12 அணிகள் பங்கேற்கின்றன. மொத்தம் 33 போட்டிகள் நடைபெறவுள்ள நிலையில், உலகின் முன்னணி மகளிர் கிரிக்கெட் அணிகள் சாம்பியன் பட்டத்திற்காக மோத உள்ளன.

ஆறு முறை சாம்பியனான ஆஸ்திரேலியா, நடப்பு சாம்பியன் நியூசிலாந்து, முன்னாள் சாம்பியன் இங்கிலாந்து மற்றும் மேற்கிந்தியத் தீவுகள் அணிகளுடன் இந்தியா, தென்னாப்பிரிக்கா, பாகிஸ்தான், இலங்கை, வங்கதேசம், அயர்லாந்து, ஸ்காட்லாந்து மற்றும் நெதர்லாந்து ஆகிய அணிகளும் பங்கேற்கின்றன.

குழு A-வில் இந்தியா, ஆஸ்திரேலியா, தென்னாப்பிரிக்கா, பாகிஸ்தான், வங்கதேசம் மற்றும் நெதர்லாந்து இடம்பெற்றுள்ளன. குழு B-வில் இங்கிலாந்து, நியூசிலாந்து, மேற்கிந்தியத் தீவுகள், இலங்கை, ஸ்காட்லாந்து மற்றும் அயர்லாந்து அணிகள் உள்ளன. ஒவ்வொரு குழுவிலிருந்தும் முதல் இரண்டு அணிகள் மட்டுமே அரையிறுதிக்கு முன்னேற முடியும் என்பதால் போட்டி கடுமையாக இருக்கும் என எதிர்பார்க்கப்படுகிறது.

உலகக் கோப்பை வரலாறு

2009ஆம் ஆண்டு நடைபெற்ற முதல் மகளிர் டி20 உலகக் கோப்பையை நடத்திய இங்கிலாந்தே சாம்பியன் பட்டம் வென்றது. பின்னர் ஆஸ்திரேலியா 2010, 2012 மற்றும் 2014 ஆகிய ஆண்டுகளில் தொடர்ந்து மூன்று முறை கோப்பையை கைப்பற்றியது.

2016ஆம் ஆண்டு இந்தியாவில் நடைபெற்ற தொடரில் மேற்கிந்தியத் தீவுகள் சாம்பியனானது. அதன் பின்னர் 2018, 2020 மற்றும் 2023 ஆகிய ஆண்டுகளில் மீண்டும் ஆஸ்திரேலியா ஆதிக்கம் செலுத்தியது. 2024ஆம் ஆண்டு துபாயில் நடைபெற்ற தொடரில் நியூசிலாந்து சாம்பியன் பட்டத்தை வென்றது.

சாதனை வீராங்கனைகள்

இந்த உலகக் கோப்பையில் 17 வயது முதல் 38 வயது வரையிலான வீராங்கனைகள் பங்கேற்கின்றனர். நியூசிலாந்தின் சூசி பேட்ஸ் மூத்த வீராங்கனையாகவும், நெதர்லாந்தின் லாரா லீஹ்முஸ் இளைய வீராங்கனையாகவும் திகழ்கின்றனர்.

சூசி பேட்ஸ், சோபி டிவைன், எலிஸ் பெர்ரி, ஸ்டெஃபானி டெய்லர், ஹர்மன்பிரீத் கவுர், மரிசேன் காப் மற்றும் சாமரி அத்தபத்து ஆகிய ஏழு வீராங்கனைகள் உலகக் கோப்பையின் அனைத்து 10 பதிப்புகளிலும் விளையாடிய பெருமையை பெற்றுள்ளனர்.

சூசி பேட்ஸ் 1,216 ரன்களுடன் உலகக் கோப்பை வரலாற்றின் அதிக ரன்கள் குவித்த வீராங்கனையாக உள்ளார். ஆஸ்திரேலியாவின் மேகன் ஷட் 48 விக்கெட்டுகளுடன் அதிக விக்கெட் வீழ்த்திய வீராங்கனையாக திகழ்கிறார்.

இந்தியாவின் வாய்ப்பு

இந்தியா இதுவரை நடைபெற்ற 9 உலகக் கோப்பைகளில் 5 முறை அரையிறுதிக்கு முன்னேறியுள்ளது. 2020ஆம் ஆண்டு இறுதிப்போட்டிக்கு முன்னேறியது இந்தியாவின் சிறந்த சாதனையாகும்.

ஒருநாள் உலகக் கோப்பை மற்றும் 19 வயதுக்குட்பட்ட மகளிர் டி20 உலகக் கோப்பை சாம்பியனாக உள்ள இந்திய அணி, இந்த முறையும் அதிக நம்பிக்கையுடன் களமிறங்குகிறது. தலைமை பயிற்சியாளர் அமோல் மஜும்தார் மற்றும் கேப்டன் ஹர்மன்பிரீத் கவுர் தலைமையில் இந்திய அணி முதல் முறையாக டி20 உலகக் கோப்பையை வெல்லும் இலக்குடன் களமிறங்குகிறது.

பேட்டிங்கில் ஷஃபாலி வர்மா, ஸ்மிருதி மந்தனா, ஜெமிமா ரோட்ரிக்ஸ், ஹர்மன்பிரீத் கவுர் மற்றும் பார்தி ஃபுல்மாலி ஆகியோர் இந்திய அணியின் முக்கிய பலமாக உள்ளனர். விக்கெட் கீப்பர்களாக ரிச்சா கோஷ் மற்றும் யஷ்திகா பாட்டியா இடம் பெற்றுள்ளனர்.

பந்துவீச்சில் தீப்தி சர்மா, ராதா யாதவ், ஸ்ரேயங்கா பாட்டில் மற்றும் ஸ்ரீசரணி ஆகியோர் சுழற்பந்துவீச்சை வழிநடத்த, ரேணுகா சிங், அருந்ததி ரெட்டி, கிராந்தி கவுட் மற்றும் நந்தனி சர்மா ஆகியோர் வேகப்பந்துவீச்சை கவனிக்கின்றனர்.

இந்திய அணியின் லீக் போட்டிகள்

• ஜூன் 14 – பாகிஸ்தான் (பர்மிங்காம்)
• ஜூன் 17 – நெதர்லாந்து (லீட்ஸ்)
• ஜூன் 21 – தென்னாப்பிரிக்கா (மான்செஸ்டர்)
• ஜூன் 25 – வங்கதேசம் (மான்செஸ்டர்)
• ஜூன் 28 – ஆஸ்திரேலியா (லார்ட்ஸ்)

இந்தப் போட்டிகள் அனைத்தும் ஸ்டார் ஸ்போர்ட்ஸ் தொலைக்காட்சியிலும் ஜியோ ஹாட்ஸ்டார் தளத்திலும் நேரலையாக ஒளிபரப்பப்படவுள்ளன.

இந்திய அணி இந்த முறை உலகக் கோப்பையை வென்று வரலாறு படைக்கும் என்ற நம்பிக்கையில் ரசிகர்கள் காத்திருக்கின்றனர். பரபரப்பும், விறுவிறுப்பும் நிறைந்த கிரிக்கெட் திருவிழாவாக இந்த மகளிர் டி20 உலகக் கோப்பை அமையும் என எதிர்பார்க்கப்படுகிறது.