கேரளாவில் கனமழை: நிலச்சரிவு, திடீர் வெள்ளத்தில் 6 பேர் உயிரிழப்பு!

கேரளாவில் கடந்த சில நாட்களாக பெய்து வரும் கனமழையால் பல்வேறு பகுதிகளில் நிலச்சரிவு, மண்சரிவு மற்றும் திடீர் வெள்ளப்பெருக்கு ஏற்பட்டுள்ளது. இதன் காரணமாக இடுக்கி, கோட்டயம் மற்றும் மலப்புரம் மாவட்டங்களில் மழை தொடர்பான சம்பவங்களில் 6 பேர் உயிரிழந்துள்ளதாக சமீபத்திய தகவல்கள் தெரிவிக்கின்றன. மேலும் சிலரை காணவில்லை என்பதால் தேடுதல் மற்றும் மீட்புப் பணிகள் தொடர்ந்து நடைபெற்று வருகின்றன. 

இடுக்கி மாவட்டம் கொட்டக்கம்பூர் பகுதியில் ஏற்பட்ட நிலச்சரிவில் ஒரே குடும்பத்தைச் சேர்ந்த இருவர் உயிரிழந்தனர். கனமழையின்போது தற்காலிக குடிலில் தஞ்சமடைந்திருந்த அவர்கள் மீது மண் மற்றும் பாறைகள் சரிந்து விழுந்ததாக தெரிவிக்கப்பட்டுள்ளது. இந்தச் சம்பவத்தில் மற்றொருவர் காயமடைந்து மீட்கப்பட்டார்.

கோட்டயம் மாவட்டத்திலும் கனமழை காரணமாக ஏற்பட்ட மண்சரிவு சம்பவங்களில் இருவர் உயிரிழந்துள்ளனர். தீக்கோய் பகுதியில் சாலையில் ஏற்பட்ட மண்சரிவில் இருசக்கர வாகனத்தில் சென்ற பெண் ஒருவர் உயிரிழந்தார். மற்றொரு சம்பவத்தில் வீட்டின் மீது மண் சரிந்து விழுந்ததில் ஒருவர் உயிரிழந்ததாக தெரிவிக்கப்பட்டுள்ளது. 

மலப்புரம் மாவட்டம் நிலம்பூர் அருகே கொட்டப்புழா ஆற்றில் ஏற்பட்ட திடீர் வெள்ளப்பெருக்கில் பலர் அடித்துச் செல்லப்பட்டனர். ஆற்றில் திடீரென நீர்மட்டம் உயர்ந்ததைத் தொடர்ந்து 6 பேர் வெள்ளத்தில் சிக்கியதாகவும், அவர்களில் 5 பேரின் உடல்கள் மீட்கப்பட்டுள்ளதாகவும் தகவல்கள் தெரிவிக்கின்றன. மேலும் ஒருவரை தேடும் பணி தொடர்ந்து நடைபெற்று வருகிறது.

கேரளாவில் தொடர்ந்து கனமழை பெய்து வரும் நிலையில், இடுக்கி மற்றும் கோட்டயம் உள்ளிட்ட மாவட்டங்களில் அதிகாரிகள் நிலைமையை தீவிரமாக கண்காணித்து வருகின்றனர். ஆபத்தான பகுதிகளில் வசிக்கும் மக்களை தேவையான இடங்களில் பாதுகாப்பான பகுதிகளுக்கு வெளியேற்றவும் மாவட்ட நிர்வாகத்துக்கு அறிவுறுத்தப்பட்டுள்ளது. 

மழை தொடர்பான பேரிடர் நிலைமையை கேரள அரசு தொடர்ந்து கண்காணித்து வரும் நிலையில், பொதுமக்கள் ஆறுகள், நீர்நிலைகள் மற்றும் நிலச்சரிவு ஏற்படக்கூடிய மலைப்பகுதிகளுக்கு அருகில் செல்வதைத் தவிர்த்து, அதிகாரிகளின் பாதுகாப்பு அறிவுறுத்தல்களைப் பின்பற்றுமாறு அறிவுறுத்தப்பட்டுள்ளனர்.