மகளிர் ஆசியக் கோப்பையை வென்ற இந்தியா: பாகிஸ்தான் அதிகாரியிடம் இருந்து டிராபி பெறவில்லை!
2026 மகளிர் டி20 ஆசியக் கோப்பை இறுதிப் போட்டியில் இலங்கையை 72 ரன்கள் வித்தியாசத்தில் வீழ்த்தி இந்திய மகளிர் அணி சாம்பியன் பட்டம் வென்றது. ஆசிய கிரிக்கெட் கவுன்சில் தலைவர் முக்சின் நக்வியிடம் இருந்து இந்திய வீராங்கனைகள் டிராபி மற்றும் பதக்கங்களை பெறவில்லை.
Prasanth Subramani 
துபாயில் நடைபெற்ற 2026 மகளிர் டி20 ஆசியக் கோப்பை இறுதிப் போட்டியில் இலங்கையை 72 ரன்கள் வித்தியாசத்தில் வீழ்த்தி இந்திய மகளிர் அணி சாம்பியன் பட்டத்தை வென்றது. இதன் மூலம் இந்திய அணி தனது 8-வது மகளிர் ஆசியக் கோப்பை பட்டத்தை கைப்பற்றியது.
முதலில் பேட்டிங் செய்த இந்திய அணி 20 ஓவர்களில் 183 ரன்களுக்கு 5 விக்கெட்டுகளை இழந்தது. இந்திய அணியின் சார்பில் ஷஃபாலி வர்மா 68 ரன்களும், ஸ்மிருதி மந்தனா 59 ரன்களும் விளாசினர்.
இதையடுத்து 184 ரன்கள் என்ற வெற்றி இலக்கை நோக்கி களமிறங்கிய இலங்கை அணி, இந்திய பந்துவீச்சை சமாளிக்க முடியாமல் 111 ரன்களுக்கு அனைத்து விக்கெட்டுகளையும் இழந்தது. இதனால் இந்திய அணி 72 ரன்கள் வித்தியாசத்தில் வெற்றி பெற்று சாம்பியன் பட்டத்தை தட்டிச் சென்றது.
டிராபி வழங்கும் நிகழ்ச்சியில் பரபரப்பு
இந்தியா சாம்பியன் பட்டத்தை வென்றபோதிலும், ஆசிய கிரிக்கெட் கவுன்சில் தலைவர் முக்சின் நக்வியிடம் இருந்து இந்திய வீராங்கனைகள் டிராபி மற்றும் பதக்கங்களை பெறவில்லை.
முக்சின் நக்வி பாகிஸ்தானின் உள்துறை அமைச்சராகவும், பாகிஸ்தான் கிரிக்கெட் வாரியத்தின் தலைவராகவும் உள்ளார். அவரது முன்னிலையில் நடைபெற்ற பரிசளிப்பு நிகழ்ச்சியில் இந்திய அணி பங்கேற்கவில்லை.
இந்த முடிவு போட்டிக்கு முன்பே ஆசிய கிரிக்கெட் கவுன்சிலிடம் தெரிவிக்கப்பட்டதாக பிசிசிஐ செயலாளர் தேவஜித் சைகியா தெரிவித்துள்ளார். தற்போதைய சூழ்நிலையை கருத்தில் கொண்டு, நக்வியிடம் இருந்து டிராபி பெறமாட்டோம் என பிசிசிஐ முன்கூட்டியே தெரிவித்திருந்ததாக அவர் கூறினார்.
இந்த சம்பவம் கடந்த ஆண்டு ஆண்கள் ஆசியக் கோப்பை இறுதிப் போட்டியில் இந்திய அணி எடுத்த அதே நிலைப்பாட்டை மீண்டும் நினைவுபடுத்தியுள்ளது.
இதனால், இந்தியா மகளிர் ஆசியக் கோப்பையை வென்று சாம்பியன் பட்டத்தை கைப்பற்றியுள்ள நிலையில், டிராபி வழங்கும் நிகழ்ச்சியில் இந்திய அணி பங்கேற்காதது புதிய சர்ச்சையை ஏற்படுத்தியுள்ளது.
