மகளிர் டி20 உலகக் கோப்பை: இலங்கையை 87 ரன்கள் வித்தியாசத்தில் வீழ்த்தி இங்கிலாந்து அபார வெற்றி
மகளிர் டி20 உலகக் கோப்பை 2026 தொடக்கப் போட்டியில் இங்கிலாந்து அணி 219/1 என்ற சாதனை ஸ்கோரை குவித்து, இலங்கையை 87 ரன்கள் வித்தியாசத்தில் வீழ்த்தியது. டேனி வயட் ஹோட்ஜ் சதம் அடித்து ஆட்ட நாயகி விருது வென்றார்.
Prasanth Subramani 
2026 ஐசிசி மகளிர் டி20 உலகக் கோப்பை தொடரின் தொடக்கப் போட்டியில் இங்கிலாந்து அணி தனது ஆதிக்கத்தை வெளிப்படுத்தி இலங்கையை 87 ரன்கள் வித்தியாசத்தில் வீழ்த்தியது. பர்மிங்காமில் நடைபெற்ற இந்தப் போட்டியில் இங்கிலாந்து 219/1 என்ற பிரம்மாண்ட ஸ்கோரை குவித்து, மகளிர் டி20 உலகக் கோப்பை வரலாற்றில் அதிகபட்ச அணி ஸ்கோர் என்ற புதிய சாதனையை படைத்தது.
டாஸ் வென்ற இலங்கை அணி முதலில் பந்துவீச்சைத் தேர்வு செய்தது. ஆனால் இங்கிலாந்து தொடக்க வீராங்கனைகளான ஏமி ஜோன்ஸ் மற்றும் டேனி வயட் ஹோட்ஜ் இலங்கை பந்துவீச்சாளர்களை தொடக்கம் முதலே ஆதிக்கம் செலுத்தினர்.
பவர் பிளே முடிவில் விக்கெட் இழப்பின்றி 51 ரன்கள் எடுத்த இங்கிலாந்து, தொடர்ந்து அதிரடி ஆட்டத்தை வெளிப்படுத்தியது. டேனி வயட் 32 பந்துகளில் அரைசதம் கடந்தார். அதேபோல் ஏமி ஜோன்ஸும் 34 பந்துகளில் தனது அரைசதத்தை பூர்த்தி செய்தார்.
இருவரும் இணைந்து முதல் விக்கெட்டுக்கு 138 ரன்கள் சேர்த்தனர். ஏமி ஜோன்ஸ் 69 ரன்களில் ஆட்டமிழந்தாலும், டேனி வயட் தனது அதிரடியை தொடர்ந்தார். கேப்டன் நாட் ஸ்கிவர்-பிரண்ட் உடன் இணைந்து இறுதி ஓவர்களில் ரன் மழை பொழிந்தார்.
இறுதி ஓவரில் டேனி வயட் ஹோட்ஜ் சதத்தை பூர்த்தி செய்து ரசிகர்களை உற்சாகத்தில் ஆழ்த்தினார். அவர் 100 ரன்களுடன் ஆட்டமிழக்காமல் களத்தில் இருந்தார். நாட் ஸ்கிவர்-பிரண்ட் 18 பந்துகளில் 43 ரன்கள் குவித்தார். இதன் மூலம் இங்கிலாந்து 20 ஓவர்களில் 219/1 என்ற உலகக் கோப்பை சாதனை ஸ்கோரை எட்டியது.
220 ரன்கள் என்ற கடினமான இலக்கை துரத்திய இலங்கை அணிக்கு தொடக்கத்திலேயே அதிர்ச்சி காத்திருந்தது. விஷ்மி குணரத்னே, சாமரி அத்தபத்து மற்றும் இமேஷா துலானி ஆகியோர் விரைவில் ஆட்டமிழந்ததால் இலங்கை 39/3 என்ற நிலையில் தடுமாறியது.
ஹன்சிமா கருணாரத்னே மற்றும் ஹர்ஷிதா சமரவிக்ரமா அணியை மீட்டெடுக்க முயன்றாலும், இங்கிலாந்து பந்துவீச்சாளர்கள் இடைவிடாது விக்கெட்டுகளை வீழ்த்தினர். குறிப்பாக ஃப்ரெயா கெம்ப் ஒரே ஓவரில் மூன்று விக்கெட்டுகளை கைப்பற்றி இலங்கையின் நம்பிக்கையை சிதைத்தார்.
இலங்கை அணியில் நிலாஷிகா டி சில்வா மட்டும் 39 ரன்கள் எடுத்து போராடினார். ஆனால் மற்ற வீராங்கனைகள் நிலைத்து நிற்கத் தவறியதால், இலங்கை அணி 132 ரன்களுக்கு அனைத்து விக்கெட்டுகளையும் இழந்தது.
இங்கிலாந்து தரப்பில் ஃப்ரெயா கெம்ப் சிறப்பான பந்துவீச்சை வெளிப்படுத்தினார். சோபி எக்ள்ஸ்டோன், லின்ஸி ஸ்மித், சார்லி டீன் மற்றும் லாரன் பெல் ஆகியோரும் விக்கெட்டுகளை கைப்பற்றி வெற்றியில் பங்காற்றினர்.
இப்போட்டியில் அபாரமான சதம் விளாசி இங்கிலாந்தை சாதனை ஸ்கோருக்கு அழைத்துச் சென்ற டேனி வயட் ஹோட்ஜ் ஆட்ட நாயகி விருதை வென்றார்.
இந்த வெற்றியின் மூலம் இங்கிலாந்து அணி 2 புள்ளிகளைப் பெற்று தொடரை வெற்றிகரமாக தொடங்கியுள்ளது. மறுபுறம் இலங்கை அணி தனது முதல் போட்டியிலேயே பெரிய தோல்வியை சந்தித்து புள்ளிகள் இன்றி தொடரை தொடங்கியுள்ளது.
