கோவை விமான நிலைய விரிவாக்கம் முக்கிய கட்டத்தில்: 621 ஏக்கர் நிலம் ஒப்படைப்பு
கோயம்புத்தூர் சர்வதேச விமான நிலைய விரிவாக்கத்திற்காக 627 ஏக்கர் நிலம் கையகப்படுத்தப்பட்டுள்ளது. இதில் 621 ஏக்கர் நிலம் இந்திய விமான நிலைய ஆணையத்திடம் ஒப்படைக்கப்பட்டுள்ள நிலையில், புதிய ஒருங்கிணைந்த முனையம் ₹2,132 கோடி மதிப்பில் அமைக்க திட்டமிடப்பட்டுள்ளது.
Dharshini
கோயம்புத்தூர் சர்வதேச விமான நிலையத்தை விரிவுபடுத்தும் திட்டம் தற்போது முக்கிய கட்டத்தை எட்டியுள்ளது. விரிவாக்கத்திற்குத் தேவையான 627 ஏக்கர் நிலம் கையகப்படுத்தப்பட்டுள்ள நிலையில், அதில் 621 ஏக்கர் நிலம் ஏற்கனவே இந்திய விமான நிலைய ஆணையத்திடம் ஒப்படைக்கப்பட்டுள்ளது. மீதமுள்ள 6 ஏக்கர் நிலமும் விரைவில் ஒப்படைக்கப்படும் என தெரிவிக்கப்பட்டுள்ளது.
விமான நிலைய விரிவாக்கத்திற்கான மாஸ்டர் பிளானுக்கு NITI ஆயோக் ஒப்புதல் வழங்கியுள்ளது. தற்போது இந்தத் திட்டம் மத்திய அரசின் Cabinet Committee on Expenditure ஒப்புதலுக்காக காத்திருக்கிறது. இதனிடையே, திட்டத்திற்குத் தேவையான சுற்றுச்சூழல் அனுமதியைப் பெறுவதற்கான பணிகளும் தொடர்ந்து நடைபெற்று வருகின்றன.
சுமார் ₹2,132 கோடி மதிப்பில் புதிய ஒருங்கிணைந்த முனையம் அமைக்க திட்டமிடப்பட்டுள்ளது. சுமார் 75,000 சதுர மீட்டர் பரப்பளவில் உருவாக்கப்பட உள்ள இந்தப் புதிய முனையம், ஆண்டுக்கு 1.2 கோடி பயணிகளை கையாளும் திறன் கொண்டதாக இருக்கும்.
விமான நிலைய விரிவாக்கப் பணிகள் நிறைவடைந்த பின்னர், கோவை விமான நிலையத்தின் மொத்த பரப்பளவு 1,047 ஏக்கருக்கும் அதிகமாக உயரும். திட்டப் பணிகள் தொடங்கிய பின்னர் சுமார் 3 ஆண்டுகளில் அவற்றை நிறைவு செய்ய இலக்கு நிர்ணயிக்கப்பட்டுள்ளது.
நிலம் கையகப்படுத்துதல் மற்றும் ஒப்படைப்பு பணிகள் பெரும்பாலும் நிறைவடைந்துள்ள நிலையில், மத்திய அரசின் அடுத்தகட்ட ஒப்புதல்கள் மற்றும் சுற்றுச்சூழல் அனுமதிகளை தொடர்ந்து கோவை விமான நிலைய விரிவாக்கத் திட்டம் அடுத்த கட்டத்தை நோக்கி நகர உள்ளது.
