நேபாள எல்லையில் புதிய ஏரி! மீண்டும் வெள்ளம் வரும் அபாயம் – சீனா எச்சரிக்கை
நேபாளம்–திபெத் எல்லைப் பகுதியில் ஏற்பட்ட திடீர் வெள்ளத்துக்குப் பிறகு லாங்டாங் லிருங் சிகரத்திற்கு அருகே புதிய ஏரி உருவாகியுள்ளது. ஏரி உடைந்தால் மீண்டும் பெரிய வெள்ளப்பெருக்கு ஏற்படும் அபாயம் உள்ளதாக சீனா எச்சரித்துள்ளது.
Dharshini
நேபாளம்–திபெத் எல்லைப் பகுதியில் ஏற்பட்ட திடீர் வெள்ளப் பேரழிவைத் தொடர்ந்து, லாங்டாங் லிருங் சிகரத்திற்கு அருகே புதிதாக ஒரு ஏரி உருவாகியுள்ளது. பனிப்பாறை சரிவு காரணமாக இந்த ஏரி உருவாகியிருக்கலாம் என கருதப்படுகிறது.
வெள்ளிக்கிழமை நிலவரப்படி, இந்த புதிய ஏரியில் சுமார் 25 லட்சம் கன மீட்டர் தண்ணீர் தேங்கியுள்ளதாக சீன அரசு ஊடகங்கள் தெரிவித்துள்ளன.
ஏரியில் தொடர்ந்து நீர்மட்டம் அதிகரித்து, அதன் கரைகள் உடைந்தால் மீண்டும் பெரிய அளவிலான வெள்ளப்பெருக்கு ஏற்படக்கூடும் என சீனா எச்சரித்துள்ளது. இதனால் தாழ்வான பகுதிகளில் வசிக்கும் மக்கள் மற்றும் மீட்புப் பணியாளர்களிடையே கூடுதல் அச்சம் ஏற்பட்டுள்ளது.
ஏரி உடையும் அபாயம் காரணமாக திபெத் பகுதியில் நடைபெற்று வந்த மீட்புப் பணிகள் தற்காலிகமாக நிறுத்தப்பட்டன. அதிகாரிகள் சம்பவ இடத்தை ஆய்வு செய்து ஏரியின் நிலைமை குறித்து மதிப்பீடு செய்தனர்.
நிலைமை கட்டுக்குள் இருப்பதாக அதிகாரிகள் மதிப்பிட்டதைத் தொடர்ந்து, தற்காலிகமாக நிறுத்தப்பட்டிருந்த மீட்புப் பணிகள் மீண்டும் தொடங்கப்பட்டன.
இதனிடையே, ஏரி உடைந்து வெள்ளம் ஏற்படுவது மட்டுமின்றி, நீர் இயற்கையாகவே வெளியேறி ஏரி வற்றுவதற்கும் வாய்ப்புள்ளதாக நிபுணர்கள் தெரிவித்துள்ளனர். இருப்பினும், நீர்மட்டத்தில் ஏற்படும் மாற்றங்களை அதிகாரிகள் தொடர்ந்து கண்காணித்து வருகின்றனர்.
ஏற்கனவே நேபாளம் மற்றும் திபெத் எல்லைப் பகுதிகளில் ஏற்பட்ட திடீர் வெள்ளப்பெருக்கால் வீடுகள், சாலைகள், பாலங்கள் மற்றும் முக்கிய உள்கட்டமைப்புகள் சேதமடைந்துள்ள நிலையில், புதிதாக உருவாகியுள்ள இந்த ஏரி மீண்டும் வெள்ளப்பெருக்கு ஏற்படும் அபாயத்தை அதிகரித்துள்ளது.
இதனால் பாதிக்கப்பட்ட பகுதிகளில் மீட்பு மற்றும் பாதுகாப்பு நடவடிக்கைகள் தொடர்ந்து கண்காணிப்புடன் மேற்கொள்ளப்பட்டு வருகின்றன. பொதுமக்கள் அதிகாரிகளின் அறிவுறுத்தல்களைப் பின்பற்றி பாதுகாப்பாக இருக்குமாறு அறிவுறுத்தப்பட்டுள்ளனர்.
