வங்கக்கடலில் வலுவடைந்த காற்றழுத்த தாழ்வு மண்டலம்: கனமழைக்கு வாய்ப்பு
வங்கக்கடலில் நிலவிய காற்றழுத்த தாழ்வுப் பகுதி காற்றழுத்த தாழ்வு மண்டலமாக வலுவடைந்துள்ளது. அடுத்த 12 மணி நேரத்தில் மேலும் வலுவடைய வாய்ப்புள்ள நிலையில், ஒடிசா மற்றும் வடக்கு ஆந்திராவில் கனமழைக்கு வாய்ப்பு உள்ளது.
Dharshini
வங்கக்கடலில் நிலவி வந்த காற்றழுத்த தாழ்வுப் பகுதி தற்போது காற்றழுத்த தாழ்வு மண்டலமாக வலுவடைந்துள்ளது. இந்த அமைப்பு மேற்கு-வடமேற்கு திசையில் நகர்ந்து, அடுத்த 12 மணி நேரத்தில் ஆழ்ந்த காற்றழுத்த தாழ்வு மண்டலமாக மேலும் வலுவடைய வாய்ப்புள்ளதாக இந்திய வானிலை ஆய்வு மையம் தெரிவித்துள்ளது.
செப்டம்பர் 22ஆம் தேதி காலை நிலவரப்படி, இந்த காற்றழுத்த தாழ்வு மண்டலம் ஒடிசாவின் கோபால்பூருக்கு தென்கிழக்கே சுமார் 220 கிலோமீட்டர் தொலைவிலும், பூரிக்கு தெற்கு-தென்கிழக்கே சுமார் 220 கிலோமீட்டர் தொலைவிலும், ஆந்திரப் பிரதேசத்தின் விசாகப்பட்டினத்திற்கு கிழக்கே சுமார் 320 கிலோமீட்டர் தொலைவிலும் மையம் கொண்டிருந்தது.
இந்த காற்றழுத்த தாழ்வு மண்டலம் தொடர்ந்து மேற்கு-வடமேற்கு திசையில் நகரும் என எதிர்பார்க்கப்படுகிறது. செப்டம்பர் 23ஆம் தேதி இரவு முதல் செப்டம்பர் 24ஆம் தேதி அதிகாலை வரை விசாகப்பட்டினம் மற்றும் கோபால்பூர் இடையே வடக்கு ஆந்திரா மற்றும் தெற்கு ஒடிசா கடற்கரையை ஆழ்ந்த காற்றழுத்த தாழ்வு மண்டலமாக கடக்கும் என கணிக்கப்பட்டுள்ளது.
இதன் தாக்கத்தால் தெற்கு ஒடிசா மற்றும் வடக்கு கடலோர ஆந்திரப் பகுதிகளில் கனமழை முதல் மிக கனமழை வரை பெய்ய வாய்ப்புள்ளது. சில பகுதிகளில் பலத்த காற்றுடன் மழை பெய்யக்கூடும் என்பதால் பொதுமக்கள் எச்சரிக்கையுடன் இருக்க அறிவுறுத்தப்பட்டுள்ளனர்.
மேலும், கடல் பகுதிகளில் கொந்தளிப்பு நிலவும் என்பதால் மீனவர்கள் கடலுக்குச் செல்ல வேண்டாம் என எச்சரிக்கை விடுக்கப்பட்டுள்ளது. ஏற்கனவே கடலில் இருக்கும் மீனவர்கள் பாதுகாப்பான பகுதிகளுக்கு திரும்புமாறு அறிவுறுத்தப்பட்டுள்ளது.
தற்போதைய இந்திய வானிலை ஆய்வு மையத்தின் கணிப்பின்படி, இந்த காற்றழுத்த தாழ்வு மண்டலம் புயலாக மாறும் வாய்ப்பு குறைவாக இருப்பதாக தெரிவிக்கப்பட்டுள்ளது. இருப்பினும், அதன் நகர்வு மற்றும் வலிமை தொடர்ந்து கண்காணிக்கப்பட்டு வருகிறது.
