கச்சா எண்ணெய் விலை உயர்வு எதிரொலி: சரிவில் முடிந்த இந்திய பங்குச் சந்தை... ரூபாய் மதிப்பும் வீழ்ச்சி!

மத்திய கிழக்கில் தொடர்ந்து அதிகரித்து வரும் புவிசார் அரசியல் பதற்றம், உலகளாவிய பொருளாதார மந்தநிலை குறித்த கவலைகள், தனியார் வங்கிகளின் ஜூன் காலாண்டு நிதி முடிவுகள் மற்றும் கச்சா எண்ணெய் விலை உயர்வு ஆகிய காரணங்களால், இந்திய பங்குச் சந்தை இன்றைய வர்த்தக அமர்வில் சரிவுடன் நிறைவடைந்தது. வர்த்தகத்தின் தொடக்கத்திலிருந்தே முதலீட்டாளர்கள் தொடர்ந்து விற்பனையில் ஈடுபட்டதால் சந்தையில் அழுத்தம் நிலவியது.

உலகளாவிய பிரென்ட் கச்சா எண்ணெய் விலை பீப்பாய் ஒன்றுக்கு 90 அமெரிக்க டாலரைத் தாண்டியதால் முதலீட்டாளர்களின் நம்பிக்கை பாதிக்கப்பட்டது. இதன் விளைவாக, வர்த்தகம் தொடங்கிய சில நிமிடங்களிலேயே நிஃப்டி குறியீடு 24,200 புள்ளிகளுக்கும் கீழே சரிந்தது. இருப்பினும், வர்த்தகத்தின் பிற்பகுதியில் வாங்கும் ஆர்வம் அதிகரித்ததால் ஆரம்ப இழப்பின் பெரும்பகுதி மீட்கப்பட்டது.

இன்றைய வர்த்தக முடிவில், மும்பை பங்குச் சந்தை சென்செக்ஸ் 442.93 புள்ளிகள் சரிந்து 77,708.52 புள்ளிகளில் நிறைவடைந்தது. தேசிய பங்குச் சந்தையின் நிஃப்டி குறியீடு 95.80 புள்ளிகள் சரிந்து 24,238.50 புள்ளிகளில் முடிவடைந்தது.

ப்ளூ-சிப் நிறுவனங்களில் பார்தி ஏர்டெல், டெக் மஹிந்திரா, என்டிபிசி, ரிலையன்ஸ் இண்டஸ்ட்ரீஸ் மற்றும் ஐசிஐசிஐ வங்கி உள்ளிட்ட பங்குகள் உயர்வை பதிவு செய்தன. மறுபுறம் கோடக் மஹிந்திரா வங்கி, இன்டர்குளோப் ஏவியேஷன், மாருதி சுஸுகி மற்றும் பஜாஜ் ஃபைனான்ஸ் உள்ளிட்ட பங்குகள் சரிவை சந்தித்தன.

ஜூன் காலாண்டில் சாதனை லாபத்தை அறிவித்ததைத் தொடர்ந்து ரிலையன்ஸ் இண்டஸ்ட்ரீஸ் நிறுவனத்தின் பங்கு சுமார் 1 சதவீதம் உயர்ந்தது. அதே நேரத்தில் ஆக்சிஸ் வங்கி, எச்டிஎஃப்சி வங்கி, மாருதி சுஸுகி, கோடக் மஹிந்திரா வங்கி மற்றும் ஜியோ ஃபைனான்சியல் சர்வீசஸ் உள்ளிட்ட பங்குகள் நிஃப்டி குறியீட்டில் அதிக இழப்பை சந்தித்தன. ட்ரெண்ட், சிப்லா, பவர் கிரிட் கார்ப்பரேஷன், பார்தி ஏர்டெல் மற்றும் ஜேஎஸ்டபிள்யூ ஸ்டீல் போன்ற பங்குகள் உயர்வுடன் முடிந்தன.

நிஃப்டி மிட்கேப் குறியீடு 0.6 சதவீதம் உயர்வுடன் நிறைவடைந்த நிலையில், ஸ்மால்கேப் குறியீடும் லேசான உயர்வை பதிவு செய்தது. துறைவாரியாகப் பார்க்கும்போது, பொதுத்துறை வங்கிப் பங்குகள் 2.8 சதவீத உயர்வுடன் சிறப்பாக செயல்பட்டன. பார்மா, மீடியா, எனர்ஜி, மெட்டல், ஆயில் & கேஸ், உள்கட்டமைப்பு, எஃப்எம்சிஜி மற்றும் கன்ஸ்யூமர் டியூரபிள்ஸ் துறைகளும் உயர்வை பதிவு செய்தன. அதே நேரத்தில் தனியார் வங்கிகள், நிஃப்டி வங்கி, ஆட்டோ மற்றும் ரியாலிட்டி துறைகள் சரிவில் முடிந்தன.

கேப்ரியல் இந்தியா, ஷியாம் மெட்டாலிக்ஸ், நவின் ஃப்ளூரின் இன்டர்நேஷனல், ஏஜிஸ் லாஜிஸ்டிக்ஸ், குஜராத் ஃப்ளூரோகெமிக்கல்ஸ், சோலார் இண்டஸ்ட்ரீஸ் இந்தியா, லாயிட்ஸ் மெட்டல்ஸ் & எனர்ஜி, ரேடிகோ கைதான், திவிஸ் லேபரட்டரீஸ், ஃபெடரல் வங்கி மற்றும் எக்ஸைட் இண்டஸ்ட்ரீஸ் உள்ளிட்ட 100-க்கும் மேற்பட்ட பங்குகள் இன்று 52 வார புதிய உச்சத்தை எட்டியது.

அந்நியச் செலாவணி சந்தையிலும் ரூபாயின் மதிப்பு அழுத்தத்தை சந்தித்தது. டாலருக்கு எதிரான ரூபாய் மதிப்பு 14 காசுகள் சரிந்து ரூ.96.44 ஆகவும், சில வர்த்தக கணக்கீடுகளின்படி ரூ.96.45 அளவிலும் நிறைவடைந்தது. நாள் முழுவதும் ரூ.96.35 முதல் ரூ.96.53 வரை ரூபாய் வர்த்தகமானது.

ஆசிய சந்தைகளில் ஷாங்காய் எஸ்எஸ்இ காம்போசிட் மற்றும் ஹாங்காங் ஹேங் செங் குறியீடுகள் உயர்வை பதிவு செய்தன. அதே நேரத்தில் தென் கொரியாவின் கோஸ்பி குறியீடு 4.35 சதவீதம் சரிந்தது. அமெரிக்க பங்குச் சந்தைகளும் முந்தைய வர்த்தக நாளில் இழப்புடன் முடிவடைந்தன.

வெளிநாட்டு நிறுவன முதலீட்டாளர்கள் கடந்த வர்த்தக நாளில் ரூ.376.41 கோடி மதிப்பிலான இந்திய பங்குகளை விற்பனை செய்ததாக தரவுகள் தெரிவிக்கின்றன. உலகளாவிய பிரென்ட் கச்சா எண்ணெய் விலை 2.41 சதவீதம் உயர்ந்து பீப்பாய் ஒன்றுக்கு 90.22 அமெரிக்க டாலராக உயர்ந்துள்ளது.

அமெரிக்கா - ஈரான் இடையிலான பதற்றம், அமெரிக்க கருவூலப் பத்திரங்களின் வருவாய் உயர்வு, கச்சா எண்ணெய் விலை அதிகரிப்பு மற்றும் உலகளாவிய சந்தைகளில் நிலவும் நிச்சயமற்ற சூழல் ஆகியவை இந்திய பங்குச் சந்தை மற்றும் ரூபாயின் மதிப்பில் குறிப்பிடத்தக்க தாக்கத்தை ஏற்படுத்தியதாக சந்தை நிபுணர்கள் தெரிவித்துள்ளனர்.