இந்தியாவில் 3 நாள் வங்கி வேலைநிறுத்தம்: செப்டம்பர் 28 முதல் 30 வரை சேவைகள் பாதிக்க வாய்ப்பு
இந்தியாவில் வங்கி ஊழியர் சங்கங்கள் செப்டம்பர் 28 முதல் 30 வரை 3 நாள் நாடு தழுவிய வேலைநிறுத்தத்தை அறிவித்துள்ளன. 5 நாள் வேலைவாரம் உள்ளிட்ட கோரிக்கைகளை வலியுறுத்தி நடைபெறும் வேலைநிறுத்தத்தால் கிளை சேவைகள் பாதிக்கப்படலாம்.
Prasanth Subramani 
இந்தியாவில் வங்கி ஊழியர் சங்கங்கள் செப்டம்பர் 28 முதல் 30, 2026 வரை மூன்று நாள் நாடு தழுவிய வேலைநிறுத்தத்தை நடத்த உள்ளதாக அறிவித்துள்ளன. செப்டம்பர் 22ஆம் தேதி நடைபெற்ற பேச்சுவார்த்தையில் உடன்பாடு ஏற்படாததைத் தொடர்ந்து, யுனைடெட் ஃபோரம் ஆஃப் பேங்க் யூனியன்ஸ் அமைப்பு வேலைநிறுத்தத்தை தொடர முடிவு செய்துள்ளது.
வங்கிகளுக்கு 5 நாள் வேலைவாரத்தை அமல்படுத்த வேண்டும் உள்ளிட்ட பல்வேறு கோரிக்கைகளை வலியுறுத்தி இந்த வேலைநிறுத்தம் நடைபெற உள்ளது. பேச்சுவார்த்தை மூலம் கோரிக்கைகளுக்கு தீர்வு காணப்படாத நிலையில், திட்டமிட்டபடி வேலைநிறுத்தம் நடைபெறும் என வங்கி ஊழியர் சங்கங்கள் தெரிவித்துள்ளன.
மேலும், செப்டம்பர் 26ஆம் தேதி நான்காவது சனிக்கிழமையாகவும், செப்டம்பர் 27ஆம் தேதி ஞாயிற்றுக்கிழமையாகவும் இருப்பதால், செப்டம்பர் 26 முதல் 30ஆம் தேதி வரை வங்கி கிளைகளின் நேரடி சேவைகள் தொடர்ந்து ஐந்து நாட்கள் பாதிக்கப்பட வாய்ப்புள்ளது.
இதனால் வங்கி கிளைகளில் நேரடியாக மேற்கொள்ளப்படும் பணப் பரிவர்த்தனை, காசோலை உள்ளிட்ட சில சேவைகளில் தாமதம் ஏற்படக்கூடும். இருப்பினும் ஏடிஎம், யுபிஐ, இணைய வங்கி மற்றும் மொபைல் வங்கி போன்ற டிஜிட்டல் சேவைகள் வழக்கம்போல் கிடைக்க வாய்ப்புள்ளதாக தெரிவிக்கப்பட்டுள்ளது.
இதனிடையே, வங்கி ஊழியர் சங்கங்களின் கோரிக்கைகளுக்கு தீர்வு கிடைக்காவிட்டால், அக்டோபர் 26, 2026 முதல் காலவரையற்ற வேலைநிறுத்தத்தை மேற்கொள்ளப்போவதாகவும் சங்கங்கள் தெரிவித்துள்ளன.
வங்கி சேவைகளை பயன்படுத்தும் வாடிக்கையாளர்கள், வேலைநிறுத்த காலத்தில் கிளை சேவைகளில் ஏற்படக்கூடிய தாமதத்தை கருத்தில் கொண்டு, தங்களது அவசர வங்கி பணிகளை முன்கூட்டியே திட்டமிடுவது பயனுள்ளதாக இருக்கும்.
