ஆசிய விளையாட்டு 2026: இந்தியாவுக்கு இதுவரை 7 பதக்கங்கள்; 1 தங்கம், 4 வெள்ளி, 2 வெண்கலம்
2026 ஆசிய விளையாட்டுப் போட்டியில் இந்தியா இதுவரை 7 பதக்கங்களை வென்றுள்ளது. மகளிர் டி20 கிரிக்கெட்டில் 1 தங்கமும், துப்பாக்கிச் சுடுதலில் 4 வெள்ளி மற்றும் 1 வெண்கலமும், கலப்பு தற்காப்புக் கலையில் 1 வெண்கலமும் கிடைத்துள்ளன.
Prasanth Subramani 
2026 ஆசிய விளையாட்டுப் போட்டியில் இந்தியா இதுவரை 7 பதக்கங்களை வென்று பதக்கப் பட்டியலில் தனது கணக்கை தொடங்கியுள்ளது. இந்தியாவுக்கு இதுவரை 1 தங்கம், 4 வெள்ளி மற்றும் 2 வெண்கலப் பதக்கங்கள் கிடைத்துள்ளன.
மகளிர் டி20 கிரிக்கெட்டில் தங்கம்
இந்தியாவின் முதல் தங்கப் பதக்கம் மகளிர் டி20 கிரிக்கெட் அணியால் கிடைத்தது. இறுதிப் போட்டியில் இலங்கை அணியை 147 ரன்கள் வித்தியாசத்தில் வீழ்த்திய இந்திய மகளிர் அணி தங்கப் பதக்கத்தை கைப்பற்றியது.
துப்பாக்கிச் சுடுதலில் பதக்கங்கள்
இந்தியாவின் பதக்க எண்ணிக்கையில் துப்பாக்கிச் சுடுதல் முக்கிய பங்கு வகித்துள்ளது. மகளிர் 10 மீட்டர் ஏர் ரைபிள் அணி பிரிவில் எலவேனில் வாலறிவன், சோனம் மாஸ்கர் மற்றும் விதர்சா வினோத் ஆகியோர் வெள்ளிப் பதக்கம் வென்றனர்.
எலவேனில் வாலறிவன் தனிநபர் பிரிவிலும் வெள்ளிப் பதக்கம் வென்றார். ஆண்களுக்கான 10 மீட்டர் ஏர் ரைபிள் அணி பிரிவில் ருத்ராங்க்ஷ் பாட்டீல், ஹிமான்ஷு தில்லான் மற்றும் பார்த்த் மானே ஆகியோர் வெள்ளிப் பதக்கம் கைப்பற்றினர்.
ஹிமான்ஷு தில்லான் தனிநபர் பிரிவிலும் வெள்ளிப் பதக்கம் வென்றார். ருத்ராங்க்ஷ் பாட்டீல் தனிநபர் பிரிவில் வெண்கலப் பதக்கம் பெற்றார்.
கலப்பு தற்காப்புக் கலையில் வெண்கலம்
இந்தியாவின் மற்றொரு வெண்கலப் பதக்கம் கலப்பு தற்காப்புக் கலையில் கிடைத்தது. மகளிர் பாரம்பரிய 60 கிலோ எடைப்பிரிவில் சுசிகா தார்யால் வெண்கலப் பதக்கம் வென்றார்.
மேலும் பதக்கங்களை எதிர்பார்க்கும் இந்தியா
2026 ஆசிய விளையாட்டுப் போட்டிகள் அக்டோபர் 4ஆம் தேதி வரை நடைபெற உள்ளன. இதனால் போட்டிகள் தொடர்ந்து நடைபெறும் நிலையில், துப்பாக்கிச் சுடுதல், தடகளம், பேட்மிண்டன், ஹாக்கி, குத்துச்சண்டை, மல்யுத்தம், பளுதூக்குதல் உள்ளிட்ட பல்வேறு விளையாட்டுகளில் இந்திய வீரர், வீராங்கனைகளிடமிருந்து மேலும் பதக்கங்கள் எதிர்பார்க்கப்படுகின்றன.
இந்தியாவின் தற்போதைய பதக்க எண்ணிக்கை:
தங்கம்: 1
வெள்ளி: 4
வெண்கலம்: 2
மொத்தம்: 7 பதக்கங்கள்
