ஜூலை 14-ல் கோவையில் மின்தடை மற்றும் குடிநீர் விநியோகம் பாதிப்பு... பொதுமக்களுக்கு முக்கிய அறிவிப்பு!
கோவை மாவட்டத்தின் பல்வேறு பகுதிகளில் ஜூலை 14, 2026 அன்று மின் பராமரிப்பு பணிகளால் மின்தடை அமல்படுத்தப்படுகிறது. அதேநாளில் மெட்ரோ குடிநீர் பராமரிப்பு பணிகளால் 24 மணி நேர குடிநீர் விநியோகமும் பாதிக்கப்படும்.
Prasanth Subramani 
கோவை மாவட்டத்தின் பல்வேறு பகுதிகளில் 2026 ஜூலை 14 (செவ்வாய்க்கிழமை) மின் பராமரிப்பு பணிகள் மற்றும் மெட்ரோ குடிநீர் பராமரிப்பு பணிகள் மேற்கொள்ளப்பட உள்ளதால், மின்சாரம் மற்றும் குடிநீர் விநியோகத்தில் தற்காலிக பாதிப்பு ஏற்படும் என்று அதிகாரிகள் அறிவித்துள்ளனர்.
தமிழ்நாடு மின் உற்பத்தி மற்றும் பகிர்மான கழகம் (TANGEDCO) வெளியிட்டுள்ள அறிவிப்பின்படி, தேவாராயபுரம், மருதூர், மாதம்பட்டி, பவானி பேரேஜ் மற்றும் பெரியநாயக்கன்பாளையம் துணை மின் நிலையங்களுக்கு உட்பட்ட பகுதிகளில் 110 கி.வோ. மற்றும் 22 கி.வோ. மின் அமைப்புகள், பிரேக்கர்கள், சுவிட்ச்கள் உள்ளிட்ட உபகரணங்களில் திட்டமிட்ட பராமரிப்பு பணிகள் மேற்கொள்ளப்படுகின்றன.
இதன் காரணமாக, சம்பந்தப்பட்ட பகுதிகளில் காலை 8.00 மணி முதல் மாலை 6.00 மணி வரை அல்லது காலை 9.00 மணி முதல் மாலை 4.00 மணி வரை மின்விநியோகம் நிறுத்தப்படும். எந்த பகுதியைச் சேர்ந்தது என்பதனைப் பொறுத்து மின்தடை நேரம் மாறுபடும்.
இதனுடன், கோவை மெட்ரோ குடிநீர் வாரியமும் காலை 9.00 மணி முதல் மாலை 4.00 மணி வரை பராமரிப்பு பணிகளை மேற்கொள்ள உள்ளது. இதனால் 24 மணி நேர குடிநீர் விநியோகத் திட்டத்தின் கீழ் குடிநீர் பெறும் கவுண்டம்பாளையம், ஹவுசிங் போர்டு, ஏ.ஆர். நகர், தாமமி நகர், டிரைவர் காலனி, சாமுண்டீஸ்வரி நகர், சுகுணா நகர், யூனியன் ரோடு, அசோக் நகர், முருகன் நகர், பாரதி நகர் மற்றும் அதனைச் சுற்றியுள்ள பகுதிகளில் குடிநீர் விநியோகம் தற்காலிகமாக பாதிக்கப்படும்.
மின் மற்றும் குடிநீர் சேவைகளின் தரத்தை மேலும் மேம்படுத்தும் நோக்கில் இந்த பராமரிப்பு பணிகள் மேற்கொள்ளப்படுவதால், பொதுமக்கள் தேவையான முன்னேற்பாடுகளை செய்து கொள்ளுமாறு அதிகாரிகள் கேட்டுக்கொண்டுள்ளனர்.
