கோவை வரலாறு படைத்தது! இந்தியாவின் 99வது செஸ் கிராண்ட்மாஸ்டராக உயர்ந்த ரத்தன்வேல் வி.எஸ்.
கோவையைச் சேர்ந்த ரத்தன்வேல் வி.எஸ்., கவுகாத்தி ஸ்மார்ட் சிட்டி இன்டர்நேஷனல் ஓபன் 2026 போட்டியில் 2500 எலோ மதிப்பெண்ணை எட்டி இந்தியாவின் 99வது செஸ் கிராண்ட்மாஸ்டராக சாதனை படைத்துள்ளார்.
Prasanth Subramani 
கோவை நகருக்கு பெருமை சேர்க்கும் வகையில், கோவையைச் சேர்ந்த இளம் செஸ் வீரர் ரத்தன்வேல் வி.எஸ். (Rathanvel VS) இந்தியாவின் 99வது செஸ் கிராண்ட்மாஸ்டராக (Grandmaster) அதிகாரப்பூர்வமாக உயர்ந்துள்ளார்.
2026-ஆம் ஆண்டு கவுகாத்தியில் நடைபெற்ற 'Guwahati Smart City International Open' சர்வதேச செஸ் தொடரில் விளையாடிய அவர், கிராண்ட்மாஸ்டர் பட்டத்திற்கு தேவையான 2500 எலோ (Elo) மதிப்பெண் என்ற முக்கிய மைல்கல்லை வெற்றிகரமாக கடந்ததன் மூலம் இந்த வரலாற்று சாதனையை நிகழ்த்தியுள்ளார்.
உலக செஸ் அரங்கில் மிகவும் உயரிய கவுரவங்களில் ஒன்றாகக் கருதப்படும் கிராண்ட்மாஸ்டர் பட்டத்தை பெற, வீரர்கள் தேவையான கிராண்ட்மாஸ்டர் நார்ம்கள் (GM Norms) மற்றும் 2500 எலோ மதிப்பெண்ணை எட்ட வேண்டும். அந்த அனைத்து தகுதிகளையும் பூர்த்தி செய்த ரத்தன்வேல் வி.எஸ்., இந்தியாவின் 99வது செஸ் கிராண்ட்மாஸ்டராக தனது பெயரை வரலாற்றில் பதிவு செய்துள்ளார்.
கோவையைச் சேர்ந்த வீரர் இந்த சாதனையை படைத்திருப்பது தமிழ்நாட்டிற்கும், குறிப்பாக கோவை நகருக்கும் பெருமை சேர்த்துள்ளது. அவரது இந்த வெற்றிக்கு செஸ் வீரர்கள், விளையாட்டு ஆர்வலர்கள் மற்றும் பொதுமக்கள் சமூக வலைதளங்கள் மூலம் வாழ்த்துகளைத் தெரிவித்து வருகின்றனர்.
இந்திய செஸ் உலகில் விஸ்வநாதன் ஆனந்த் தொடங்கி பல உலகத் தரம் வாய்ந்த கிராண்ட்மாஸ்டர்களை உருவாக்கிய பாரம்பரியத்தில், தற்போது ரத்தன்வேல் வி.எஸ். இணைந்திருப்பது இந்திய செஸ் வளர்ச்சிக்கு மேலும் ஒரு முக்கிய மைல்கல்லாக கருதப்படுகிறது. எதிர்காலத்தில் உலக அளவிலான போட்டிகளில் இந்தியாவுக்கு பெருமை சேர்க்கும் வீரராக அவர் திகழ்வார் என்ற நம்பிக்கை அதிகரித்துள்ளது.
