சிஎஸ்கேவுக்கு அதிர்ச்சி தோல்வி.. பிளே ஆஃப் வாய்ப்பு கேள்விக்குறி!

நடப்பு ஐபிஎல் தொடரில் சென்னை சூப்பர் கிங்ஸ் அணி மீண்டும் தோல்வியை சந்தித்துள்ளது. சன்ரைசர்ஸ் ஹைதராபாத் அணிக்கு எதிரான முக்கிய போட்டியில் தோல்வியடைந்ததால், சிஎஸ்கே அணியின் பிளே ஆஃப் வாய்ப்பு மிகவும் குறைந்துள்ளது.

ஐபிஎல் தொடரின் 63ஆவது லீக் போட்டி சென்னை சேப்பாக்கத்தில் உள்ள எம்.ஏ.சிதம்பரம் மைதானத்தில் நடைபெற்றது. இதில் டாஸ் வென்ற சென்னை சூப்பர் கிங்ஸ் அணி முதலில் பேட்டிங்கைத் தேர்வு செய்தது.

முதலில் களமிறங்கிய சிஎஸ்கே அணி, 20 ஓவர்களின் முடிவில் 7 விக்கெட் இழப்பிற்கு 180 ரன்கள் எடுத்தது. அணியின் சார்பில் டெவால்ட் பிரேவிஸ் அதிகபட்சமாக 44 ரன்கள் எடுத்தார். கார்த்திக் சர்மா 32 ரன்கள் சேர்த்து அணிக்கு உதவினார்.

ஹைதராபாத் அணியின் கேப்டன் பாட் கம்மின்ஸ் அபாரமாக பந்துவீசி 3 விக்கெட்டுகளை கைப்பற்றினார். சகிப் ஹுசைனும் 2 விக்கெட்டுகள் எடுத்து சிஎஸ்கேவின் ரன் வேகத்தை கட்டுப்படுத்தினார்.

பின்னர் 181 ரன்கள் என்ற இலக்குடன் களமிறங்கிய சன்ரைசர்ஸ் ஹைதராபாத் அணி அதிரடியாக விளையாடியது. இஷான் கிஷன் அபார ஆட்டத்தை வெளிப்படுத்தி 70 ரன்கள் எடுத்தார். ஹென்ரிக் கிளாசன் 47 ரன்கள் சேர்த்து வெற்றியை எளிதாக்கினார்.

இதன் மூலம் சன்ரைசர்ஸ் ஹைதராபாத் அணி 19 ஓவர்களில் 5 விக்கெட் இழப்பிற்கு 181 ரன்கள் எடுத்து வெற்றி பெற்றது.

சிஎஸ்கே அணியின் சார்பில் முகேஷ் சௌதரி 2 விக்கெட்டுகளை கைப்பற்றினார்.

இந்த வெற்றியின் மூலம் சன்ரைசர்ஸ் ஹைதராபாத் மற்றும் குஜராத் அணிகள் பிளே ஆஃப் சுற்றுக்கு தகுதி பெற்றுள்ளன. ஏற்கெனவே ராயல் சேலஞ்சர்ஸ் பெங்களூரு அணி பிளே ஆஃப் சுற்றை உறுதி செய்துள்ளது.

இந்த தோல்வியால் சென்னை சூப்பர் கிங்ஸ் அணியின் பிளே ஆஃப் கனவு தற்போது கேள்விக்குறியாகியுள்ளது.